Fasiliteite & Dienste
Wooneenhede
Die wooneenhede wissel van een- tot drieslaapkamer-eenhede, met sommige wat een motorhuis en ander wat twee motorhuise het. Alle eenhede het ook ‘n motorafdak. Die geboue is opgerig met sierstene en het teëldakke. Elke eenheid beskik oor sy eie water- en kragtoevoer, met individuele meters om die verbruik van water en elektrisiteit vir elke eenheid apart te meet. In 2018 is alle eenhede toegerus met optiesevesel-aansluitings, wat hoëspoed-internet en telefoondienste moontlik maak. Inwoners moet egter self ‘n internetdiensverskaffer kies en die installasie van die diens reël.
Die voorkoms en styl van die eenhede kan gesien word in die volgende foto’s:
Een slaapkamer eenheid
Twee slaapkamer eenheid
Drie slaapkamer eenheid
Gemeenskap Saal
Die gemeenskapsaal, met plek vir ongeveer 150 inwoners, dien as ‘n veelsydige ruimte vir ‘n verskeidenheid geleenthede. Benewens die jaarvergaderings, word die saal gebruik vir funksies en aktiwiteite waaraan alle inwoners kan deelneem. Elke Sondagaand, buiten tydens skoolvakansies, word daar eredienste in die saal gehou, met predikante van verskeie denominasies wat die dienste lei.
Die saalkompleks het ook ‘n kleiner saal beskikbaar, wat gereeld gebruik word vir bestuurskomitee-vergaderings. Bybelstudiegroepe in die oord kom dikwels hier bymekaar vir hul sessies. Verder is die kompleks toegerus met ‘n goed ingerigte kombuis en spens.
Inwoners het die voordeel om beide die hoofsaal en kleinsaal kosteloos te gebruik vir privaat funksies soos verjaardae of gesinsbyeenkomste.
Die administratiewe beampte se kantoor is ook in die saalkompleks geleë. Benewens haar pligte vir die oord, bied sy ook dienste aan inwoners soos die duplisering en waarmerking van dokumente en die verspreiding van omsendbriewe en ander relevante inligting.
Karavaan Staanplek
Aangesien ‘n relatief groot aantal inwoners oor karavane beskik, is ‘n karavaan staanplek op die terrein tot stand gebring. Die staanplekke word verhuur en Renaissance Beleggings beheer en bestuur die fasiliteit. Daar is staanplek vir 12 karavane en enkele ruimtes vir die berging van klein sleepwaentjies. Geen karavane mag elders binne die oord vir langer periodes geparkeer word nie.
Sekuriteitsdienste
Montana Renaissance is ‘n aftreeoord wat van die begin af goed toegerus is met ‘n elektriese omheining en ‘n wagpos by die hoofingang. Die sekuriteit word verskaf deur ‘n geregistreerde sekuriteitsmaatskappy, en ‘n lid van die Bestuurskomitee is verantwoordelik vir sekuriteit. Hierdie bestuurslid monitor voortdurend die veiligheid van die oord, doen maandeliks verslag oor sekuriteitskwessies, en identifiseer areas wat ekstra aandag benodig. Die sekuriteitslid is ook deel van die Dagbestuurspan van die oord.
Die oord beskik oor 24/7 toegangsbeheer, met wagte wat dag en nag diens doen by die hoofhek. Hulle beheer nie net voertuie wat in- en uitgaan nie, maar voer ook gereelde inspeksies van die elektriese omheining uit en patrolleer die strate snags. Spesifieke klokpunte word nagegaan om te verseker dat patrollies op die regte tye uitgevoer word. Inwoners word gereeld via omsendbriewe op hoogte gehou van enige veranderinge in die sekuriteitsreëlings. ‘n Omvattende Nood- en Brandplan is in werking en kan by die Administratiewe Beampte verkry word.
Tuindienste
Die oord maak gebruik van ‘n eksterne kontrakteur vir die lewering van tuindienste. Hierdie dienste sluit hoofsaaklik die sny van grasperke binne die oord in, asook die skoonmaak van blombeddings, wat gewoonlik in samewerking met die betrokke inwoners gereël word. Die vee van die strate en die verwydering van tuinafval is ook deel van die kontrakteur se verantwoordelikhede. Daarbenewens het die kontrakteur ‘n ooreenkoms om kombuisafval een keer per week te verwyder en by die hek in vullishouers te plaas, waarna die stadsraad dit leegmaak. Die kontrakteur spuit ook gereeld onkruid wat in die skeure van of langs die paaie opkom.
Aangesien dit ‘n selfversorgende oord is, is elke inwoner verantwoordelik vir die ontwikkeling en instandhouding van die tuin rondom hul eenheid. Twee inwoners, saam met die tuinhulp, dra die verantwoordelikheid vir die ontwikkeling en instandhouding van die tuine by die ingang, saal, en ander gemeenskaplike areas van die oord.
Fasiliteite
Geen herwinning geskied tans binne die oord nie, alhoewel verskeie opsies op hierdie stadium ondersoek word.
Binne ongeveer een kilometer van die oord af, by Montana Junction, bestaan ‘n omvangryke herwinningspunt.
